老友敍舊

琴晚同班廿年前, 我響土木工程顧問公司做嗰 d 舊同事, 食飯吹水唔抹嘴. 話說家陣失業率高企, 不過席上, 除咗一位巳退休嘅之外, 暫且人人有工開; 一句 I am still alive, 代表咗大家多年無見, 經歷金融風暴, SARS, 金融海嘯後, 好彩仲未死得去, 苟延殘喘之懷.

小明, 當年嘅口水佬, 咩都多多意見, 係個超級吹水怪, 唔做 sales 嘥晒; 當年我同小明同蕭公子等幾個都係做 draughtsman, 而蕭公子今時今日都仲做緊, 不過轉咗去 contractor 俊和度做.

Kitty 姐, Eliza, Alice, 呀宮, Maggie, 琴姐, 都係以前公司 d 大姐大, 秘書, accountant, reception, 茶水呀姐等, 嗰陣時公司規模細, 數埋得幾廿人, 家庭式作業, 所以大家關係唔錯, 先可以 keep 到宜家.

當中最掂嘅, 要數 Thomas 兄, 當年佢只係做鴨仔 GradE, 當然, 鴨仔會長大, Thomas 兄考牌後就入咗水記做公墓員, 做 engineer 一做就做咗十幾年, point 至 max 44, 排隊等升 senior.

當中最富貴嘅, 要數 Kitty 姐, 不過就因為最富貴, 受海嘯打擊亦都係最大; 舊年至今, 英磅由對港紙 16 蚊一直跌到得 11 蚊, 佢副英磅身家, 就咁就無咗三分一.

散 band 後, 坐 Thomas 兄嘅順風車過海, 佢揸嘅係最新款德國 Audi 房跑車, 成四十萬部, 果然係有 taste 嘅高產人士.

Written by cheapboss on February 18th, 2009 with no comments.
Read more articles on 生活壓力.

勁播放機

屋企架 DVD 機忽然虧虧哋, 又行開 SSP 高登黃金, 就留意吓 d 多媒體播放機, 先發覺宜家 d 播放機咁鬼犀利, 又唔係貴, 工能又多, 唔係話買廣告, 都要幫佢推吓.

我嘅要求第一, 宜家大把電視劇, 日劇, 韓劇, 電影 bt, 好多都係用 rm/rmvb 格式嚟壓, 貪real 嘅壓縮比高, file 體積小, 一粒鐘嘅劇集都係 200M 左右, 所以多媒體播放機一定要 support 到 rm/rmvb 同埋其它格式, 如 avi, DivX, mpeg-4 等; 第二, 用得 rm/rmvb 格式嘅劇, d 解像度都唔慌高, 所以部機唔洗一定要有 hdmi, 但係至少要有色差 out, 如果有 vga, 可以插電腦 mon 就更好; 第三, 要駁到外置 usb harddisk 同埋手指, 宜家 d 手指超平, 16G 都係 200 蚊有找!

結果琴日買咗部元谷魅影 RealStar RMVB 多媒體播放機, support 內置 2.5 吋 sata harddisk, 有色差 out, 冇 hdmi, 最特別係佢有 usb host, 駁外置 usb harddisk, 手指, 甚至 usb all-in 1 multi card reader 都得; 我試過同時插 cf card, mmc 同 sd card 入個 card reader 度, 個 RealStar 播放機出到 c: d: e: 3 張 card 個 drive, 真係利害!

響灣仔 298 度買, 原價 $499, 上 MST 度印張 coupon 就仲平 d, 只係 $470 (唔包 hdd 同個 card reader),  享受超值, 性價比一流.

註: 部 RealStar 可以出 vga, 不過要配多條 cable, 盛惠 80 蚊. 另外, 琴晚試插部外置 usb dvd drive 落去部機度. 哈哈! 緊係認唔到啦!

後註: 旺電一樓見部 RealStar 最平賣 $458; 行上三樓配番部 2.5 吋 WD 320G SATA hdd, 盛惠 409 蚊, 大出血.

Written by cheapboss on February 12th, 2009 with no comments.
Read more articles on 資訊科技.

四月後市

琴日 (2日) 臨收市, 4:05pm 至 4:12pm 期間, 四月 HSI 大權曾出現異動, 有幾單直接大手交易成交, 斷估應該係跨價組合. 第一單大手成交 500 套, 響 4:05pm 先出現, 係 4 月份大權 HSI 13000 call 同 16000 call, 造價分別為 1240 點和 250 點, 差價為 990 點. 於 4:10pm、4:11pm 同 4:13pm, 大戶繼續加注同樣嘅策略組合, 成交數量分別為 500 套、500套同 250 套.

點睇呢單大 deal, 為數合共 1750 套嘅 HSI 大權跨價認購期權組合, 應屬同時 long 13000 call 同 short 16000 call, 或者相反, 同時 short 13000 call 同 long 16000 call; 於恆指位於 12861 時, 大戶入市做呢兩個行使價嘅跨價部署, 斷估多數係 long 13000 call 同 short 16000 call.

齋睇呢單期權部署, 即係話大戶認為未來三個月內恆指會響 13000 點水平之上,但係唔會升穿 16000 點, 但如果係相反, 即係大戶認為未來三個月內, 恆指將於13000 點水平之下.

照計, 由於即使恆指唔升穿 13000 點, 大戶每套組合嘅利潤只係得 990 點, 遠低於最高損失空間 (16000 - 13000) - 990 = 2010 點, 加上港股短期已超賣, 估計大戶唔會咁樣做, 因為計值博率一 d 都唔吸引. 又如果大戶做 long 13000 call 同 short 16000 call, 每套組合俾 990 點, 但係最多可以賺成 2010 點; 由此可以斷估呢個先係大戶嘅部署.

再斷估呢一兩個月之內, 港股仲未有運行, 所以大戶部署響 4月嘅期權; 雖然呢單料對短期啟示唔大, 但因為大戶要動用嘅資本勁大 (for short 16000 call 嘅按金), 所以千奇唔好睇小呢單 deal  嘅重要性, 預示咗大戶睇中期後市應為升市.

Written by cheapboss on February 3rd, 2009 with no comments.
Read more articles on 期權盤路.

術數測市

路透香港1月23日電 (記者 James Pomfret) — 香港多位風水大師表示, 即將迎來的中國農曆牛年將出現全球金融危機進一步惡化、甚至武力衝突增多的局面, 不過他們表示牛年也並非全是凶兆.
身為亞洲金融之都之一的香港非常推崇風水師和算命人士, 他們利用中國傳統陰陽理論占卜吉凶、為顧客提供投資理財建議等.
下週一將正式迎來中國農曆牛年, 今年可能成為包括美國總統奧巴馬在內所有人都會頭疼的一年.
“牛年將是九紫火年, 因此火能非常密集… 這可能帶來大火之災, 或者戰事、種族衝突等類似災難”, 香港風水師Raymond Lai 表示.
香港卜卦師楊天命 (Alion Yeo) 認為, 全球金融市場今年5月和6月將再次出現巨變. 他之前曾預測出2008年的金融震盪, 以及世界東方會發生一次重大災難.
“屆時將再出現一次重大危機, 美國會再次出現泡沫破裂, 而且會比去年更為嚴重”, 楊天命稱. 他的客戶中包括香港頂級銀行家和娛樂明星等.
風水大師蘇民峰 (Peter So) 也認為, 2009年依然陷入逆流. 他在香港擁有自己的電視節目, 其作品遍佈香港書店.
“我們得等到2011年至2015年間的年份, 才會呈現較為穩定的時期. 每12年我們會經歷一個經濟週期, 現在牛年是一個過渡年份.”
但蘇民峰用一連串的風水術語解釋說, 牛年銀行業、航運業、旅遊業等利好, 因為這些行業跟”水”有關.
“現在沒人願意股票增倉, 但現在當然是最好的買入時機, “他表示說, 並表示他在本周買進了銀行業巨頭滙豐控股的股票.
風水師們還對奧巴馬進行了預測, 認為他儘管生在牛年, 但今年將面臨艱巨挑戰.
“在2009年, 奧巴馬將遭遇命運與厄運的對撞. 他會面臨一系列事件, 可能令他陰溝翻船, 主要是執政難題”, 蘇民峰說.
但儘管所有不利因素, 他們認為2009年仍會屬於否極泰來的一年.
“在8月可能會有好消息”, 楊天命稱, “我堅信年底前會開始穩定下來”.

註: 某程度上, 我並不排斥風水命理等之玄學, 但係, 咸豐年前根本就冇咩股市滙市, 金融証券, 就算玄學術數再利害, 以前流傳落嚟 d 古法, 又點樣可以用嚟測市? 術數測市之說, 簡直係謊天下之大謬.

以我理解嘅風水, 基本上就似係一種模型 (model), 風水挌局為之 conceptual model, 響靚 model 度輸入 d 靚數據, 咩左青龍, 右白虎, 南朱雀, 後玄武, 就得出靚嘅居住環境; 現代城規同建築, 好多呢 d 規則都仍然適用.

至於命理術數, 我則理解為古法之統計學, 好似咩時辰八字出世嘅人, 到某年某月會發達嘅機會大 d 等等; 不過，呢門學問嘅局限性非常之大, 皆因現代環境, 人脈關係錯綜複雜, 以此等玄學預測現代經濟體系之市塲變化, 就更加係得啖笑, 影響市塲嘅因素實在太多, 當中包括有無窮無盡嘅中外經濟走勢, 更加有史無前例嘅次按危機, 金融海嘯等, 又點會俾呢 d out 晒 date 嘅玄學可以洞悉呢?

有曰: 差之毫釐, 謬之千里; 如果係都要用玄學測市嘅升跌, 不如擲毫決定算了; 公就升, 字就跌, 簡單 d, 唔洗咁煩.

Written by cheapboss on February 1st, 2009 with no comments.
Read more articles on 未有分類.