月頭嗰陣無咁忙, 便同埋退休權友去大福聽講座, 講開得知, 老友月頭 long 咗 20800 put, 付期權金搏恆指跌開繼續跌, 點知佢開倉第二日, 恆指巳經反彈四佰幾點, 跟著一 d 都無俾機會佢平倉, 月頭至宜家, 巳經有成 2000 多點升幅, 老友 500 幾點期權金可能就咁忍著淚說 good bye 了. 呢 2000 點升幅, 我諗跟本同大部份老散無緣, 賺到呢轉錢嘅, 只有極少數人, 而輸熊証嘅人就大把.

話說一早就提老友, 國慶後市, 一定會大單邊, 不過吾能知升定跌, 所以要落 long 注, 最穩陣就係 long 晒兩邊, 齋做一邊就如同買大細, 如果 win, 當然贏開巷, 但係輸起上嚟會輸得好快; 而做即月期權 long, 就等同炒末日輪, 時間會係你嘅一大敵人, 炒賣見機要快, 莫全憧憬, 有賺就要走, 輸錢就更加要走得快.

希望老友有記得我講過, 國慶假後就要至少平部份倉, 減低風險, 一到月中就要平晒所有 long 倉, 全面止賺 or 止蝕, 千其唔好繼續揸 long 等運到, 否則輸時間值, 會輸得好金. 而至於我, 仍然係只會 short, 吾會 long; 其實咁耐以嚟, 我都只係好耐以前 long 過一次咁大把, 而嗰次只不過係(手禁)錯機, 竟然一次過 long 錯咗 21 張大期! 嗰次嘅結果, 就更係輸到呀媽都唔認得啦.

噚日恆指期結, 月中曾經致電揾退休權友, 一直都揾佢唔到, 擔心不已佢有咩事, 今日終於打通電揾到佢, 佢話就話反咗去大陸玩, 但係問多幾問, 先知佢月頭 short 咗 21000 call!!! 我諗番月中我打電話俾佢嗰陣, 恆指係響 21700 度上落緊, 佢月頭開倉, 賬面咪輸緊成 3 萬幾蚊一張合約! 佢嗰陣一定唔係響大陸玩, 而係輸到無心機聽我電話了. 好在老友死揸挨到月尾, 結果反敗為勝, 不過又係食足成個月驚風散, 賺幾多都補唔返. 唉, 老友咁賭法, 遲早有一鋪要上 IFC 玩笨豬 jump.

就嚟 10.1, 大陸今年國慶+中秋 8 day 大假, 係有屎以嚟最長黃金週假, 由 10 月 1 日放到 10 月 8 日, 10 月 9 日先返工, 對於我嚟講, 呢個係千年難得一見 short 國企指數期權賺錢嘅好機會, 不容錯過, short 晒兩邊 call put, 賺時間值嘅期權金, 包保賺到笑, 實食冇黐牙. 不過黃金週假後, 國指走勢難測, 所以 9 號之前就要收手平倉了. 如果 9 號前唔平倉, 輸咗唔好入我數.

其實我都幾鍾意過 d 咁嘅日子, 與世無爭, 安閒寧靜, 當然最好係不愁衣食, 如果有埋部寬頻上網嘅電腦咁就最好. 可惜嗰度不單只冇寬頻, 冇電腦, d 人冇品, 兼且 d 治安差, 仲要格涉到爆, 門口行去村口都要成半粒鐘, 等車搭車出到市又要粒幾鐘, 一出一入來回冇咗半日, 如果要朝早出市辦事, 雞啼就要起身, 不過佢哋都習慣咗晨早 5,6 點起身了.

好很奇怪, 最近經常有呢種恍如隔世嘅感覺, 好似嗰幾日行開咗, 冇理 d 咩財經股市, 不問世事幾日, 返到香港, 好似好陌生, 返到公司, 連枱頭部機個 login password 都唔記得咗, 山中一日, 直情係人間十年; 又好似, 先兩日出到去高登, 又係好似好陌生咁, 多咗好多新鋪, 見到好多新嘢, 奇怪嘅係, 我上次嚟高登只係 4, 5 個月前, 點解變化咁大嘅?

又好似, 近日我重操當年 web-based GIS 嘅故業, 積極咁研究 Google Maps API 點用, 驀然回首, 我當年用 MapInfo MapXtreme 做 engine 自巳起 web map server 己經係 10 年前嘅事, 睇下 e 家個 Google Maps, 個 engine 又快, d 圖資 data 又多又齊, 有全世界嘅, 又有香港嘅, 雖然唔算好準好 update, 不過難得嘅係, Google 免費俾晒 d 嘢你任用唔嬲, 仲俾埋 API 你寫 program 嚟 call 佢用, 最近睇佢嘅 API 巳經係發展到第三代了, 而第一, 第二代嘅 API, 我都 miss 咗, 無點留意過, 自 2005 公開到 e 家, 轉眼 Google Maps 都 4 歲幾了.

唔知係呢個世界轉得快咗, 定係我嘅中年遲鈍病發, e 家 d 嘢, 就好似股市, 天氣, 同埋大人 d 脾氣咁, 變化之快另我有窒息嘅感覺, 往往迅雷不及掩耳, 睇嚟我都係時候準備退休返鄉下了.

不過, 人生唔係成日都咁好彩嘅, 有陣時, 一個無喱頭嘅决定, 就足以改變劇情, 好似, 如果大人跟我一齊停低, 買塊蔥油餅食埋先行, 可能就係咁, 就趕唔到搭車了. 而然, 好多時 d 錯誤嘅決定, 都係響匆忙之間做嘅; 但係有陣時, 就算大把時間俾你 plan, 但世事多變, 你又 count 得幾多 factor 呢? 變數多的是, 機關算盡又如何? 諗起許歌神嘅名曲歌詞, “人生如賭博, 贏輸都冇時定, 贏左得餐笑, 輸光唔駛興”.

今日老細又再一次, 迫我做去定留嘅决定, 今次係 final 了, 結果無出其右, 都係選擇留低, 呢度始終都係安全區, 出面風大雨大, 炮火連天, 小弟仔細老婆嫩, 房奴一族擔子非輕, 實在蕭灑不起, 豁不出呢個安全區呢! 真正係歌神嘅”為兩餐乜都肯制前世”.

過兩日會去 in 番同 e 家同一個 post, 如無意外, 應該無意外了, 白忙咗個幾月, 兜兜轉轉, 又係原地踏步, 坐番同一個位, 對番同一班客, 做番同一樣嘅嘢, 人工就…哈哈哈. 有時塞翁失馬, 焉知非福, 世事難料, 你以為佢開大咩, 佢就偏開細, 你估佢開細咩, 佢就開圍骰, 人生禍福、好壞本來就無從預算. 俾你趕到尾班車又點呢? 結果班飛機咪一樣 delay, 返到深圳, 夜到連火車都收埋工. 人算不如天算.

睇番自巳個 CV, 覺得以前比 e 家勤力得多, 至少肯俾心機考番幾張 M 記嘅 cert, 嗰陣仲係行緊 Win 98, NT4 Server, 到今時今日 Windows 7, Win 2008 Server R2 都嚟緊, d cert 全部都過期幾過世代, 大有 cert 到用時方恨少之感, 寫埋落 CV 度, 實比人問到口啞啞… 呀叔, 你 d cert 仲有冇 out d 呀?

記得先排響公司, propose 新買 d server, 用 Win 2008 Server 嚟起, 點知比個同事窒到冇朋友, 話起咗個 server, 邊個做 support 先? 你做 support 呀? 咁你有冇 cert 呀? 即時 O 嘴冇聲出. 然則, 冇 cert 唔代表我唔識, 就算有張 cert, 靠背 braindump 考番嚟, 咁又代表有能力咩? 張 cert 可以代表嘅嘢, 實在太有限了.

上 M 記網 Certification 度睇睇, 先發現 MCSE 2003 都開始 out 了, 新涵頭叫 MCTIP, 至少要 pass 5 科, 每科考試費 625 蚊, 淨係考試都成 3 仟幾, 唉, 又要錢, 又要時間, 又要心機讀書考試, 真係攞嚟賤, 不過為咗揾食, 同埋為咗啖氣, 無辦法, 唯有的起心肝, 考番過晒 d cert 啦.

其實呢個 idea 都唔係 d 咩新橋, 幾個月前明珠台都播過一套英國 BBC 兩年前拍嘅《做個冇錢人》, Filthy Rich and Homeless, 港台個節目都係抄佢, 不過 BBC 嗰套仲勁, 響 London 過十日, 生活費一個仙都冇之餘, 頭六日連瞓嘅地方都冇, 仲要第四晚凍到落雪, 嗰幾條友瞓足六日街, 行乞賣花揾食, 都係自己攪掂! 反觀 RTHK 嗰班, 除咗個 Eric 外,  個個有工開, 有地方瞓, 都唔駛衰到瞓街, 相比 BBC 嗰班已經算十分富足了.

話時話, 嗰幾條蛋散都真係玩到無野好玩, 走去玩折墮挨窮, 不過只係放下身段 hea 5 日, 之後又咪做返有錢人, 繼續佢哋嘅風流, 佢哋體驗到嘅, 就只係嗰 d 好膚淺嘅所謂貧窮, 點樣點樣, 冇人冇物, 孤單隻影, 點樣點樣, 前路茫茫, 擔驚受怕,  又點樣點樣, 打份牛工, 辛苦疲累等等…

講窮莫過於非洲大陸, 水資源貧乏, 唔好話沖涼洗衫, 就連想飲啖乾淨清潔嘅水, 都係一件奢侈嘅事, 佢吔 d 婦女同細路, 每日都要翻山越嶺, 走去遙遠嘅水源度打水回家, d 細路一來一回行足大半日, 時間就花咗響打水度, 而唔係去返學讀書, WHO 用嚟量度呢個問題嘅嚴重性, 就係睇每人每日行幾遠去水源, 同埋平均用幾多個鐘去打水! 相對於我哋, 要用水嘅時候, 只須開水喉, 去完廁所拉水沖走, 呢 d 對佢哋嚟講, 簡值係窮奢極侈, 天堂生活, 可以擁有一個會出乾淨水嘅水龍頭, 巳經係上天嘅恩賜了.

從來富與貧, 喜與悲, 新與舊, 都只係相對性嘅, 要有比較先會顯露, 無舊嘅顯不出新嘅, 無悲亦唔會有喜, 同樣地, 要有窮鬼先會有富翁, 如果冇咗比較, 點樣窮法都唔會窮得過響非洲, 響香港點折墮極都有啖水飲卦! 又如果要比較, 就算你可以餐餐魚翅撈飯, 大魚大肉, 但係相對 Bill Gates, 巴菲特, 李嘉誠, 你又算老幾? 比起上嚟, 你都算窮得可憐了.

其實, 問題係咩先算窮呢? 窮點樣定義呢? 要窮到水都得飲先算窮, 定係要將所有人嘅財富平均計, 低過平均嘅就算窮呢? 再者, 就算係窮, 又未必等如唔開心, 調轉嚟講, 就算富貴, 都未必一定開心. 講到尾都係嗰句, 知足者貧亦樂, 不知足者富亦憂是也.

老友冇俾意見我, 不過就同我用知見開悟卡玩塔羅, 是旦抽張, 睇吓張卡有咩 hints 俾到我, 就咁睇好似又係 d 呃人嘅迷信嘢, 其實又未至於此, 每張卡只得個模稜兩可嘅單字 (in English), 仲衰過扶乩, 任你點演譯 up 乜都得, 咩都無講實, 目的就係叫你自巳諗, 至於諗得啱唔啱, 亦都冇人會知, 對與錯只有事過境移才有定論. 咁即係話, 問嚟都多餘, 自已諗掂佢啦! 哈哈.

當然, 邊個唔想有份唔洗做, 人工好又有身份地位嘅 job, 除咗老豆凈落大把, 做二世祖之外, 睇怕都冇矣. 在我而然, 其實要二簡一唔難, 始終係辛苦命錢大 d, 一定係簡份人工好嘅, 就算挨世界都係咁話, 呢個選擇, 可能係反映咗細個嘅時候屋企窮, 正當個個細路週街玩緊嘅時候, 我哋就屈響屋企開工揾食, 自小巳經為咗錢挨慣做慣了. 究景係咪因為咁, 所以就有日後 d 咁嘅慣性選擇呢?

畢竟, 呢個未係一個真正嘅問題, 只係一個假切性嘅問題. 實情係 e 家香港失業大軍廿幾萬人壓境, 差唔多 6% 失業率, 短期內有升冇跌; 人浮於事之際, 邊有可能同時揾到兩個咁高興嘅 offer? 有得 in 都好開心了, 所以只係無風吹吓水, 發吓春秋大夢啫.

當然, 呢 d 所謂分享聚會, 都係賣藥式嘅傳銷手法, 對老友嚟講, 可能只係佢導師培訓嘅一個習作, 然則, 小弟對呢 d 勵志課程冇咩偏見同反感, 佢只係教導一 d 方法, 疑似係 d 心理分折工具, 話可以助人思考, 至於向善定行惡, 則悉隨尊便.

從呢班人中, 都領略出一 d 嘢, 佢哋第一次見面, 都係同你講, 你好面善, 好似響邊度見過你咁, 唔係一個半個係咁, 而係個個都係咁講… 哈哈, 一睇就知係同一個 course 同一個 tutor 教出嚟嫁啦, 第一次見面就扮相識扮熟絡, 唔係咁老土呀?

先排睇咗套杜琪峰嘅戲叫神探, 講話每個人心里都有鬼, 而所謂嘅鬼, 就係由細到大久而久之累績嘅經驗, 行為, 思考模式, 習慣等個性, 又因為你做咗咁多年人, 早就依賴咗呢 d 個性, 對事對人每有特定嘅做法同睇法, 而呢 d rule 對絕大部分人嚟講, 都行之有效, 點解要改變呢? 改變咗唔一定會好咗, 衰起上嚟, 轉變可以衰上加衰, 好似 d 股價響股災咁, 低處低未算低, 跌極都仲有得跌.

知見治療話可以幫人深層了解, 突破自已心里嘅鬼, 不過我響會上都提出咗, 跳出既有嘅安全框, 作出改變係會有重大風險的, 情形猶如響 firewall 里面, 將一 d 以前 set 落嘅 rule 刪除, 而呢 d rule 可能已經過時, 可能已經無用, 但係最大嘅可能係, 個 firewall 已經俾你廢咗, 中門大開, 你話危唔危?

而認識一種工具亦不等如要運用該等工具, 就好似兩年前, 有朋友教我認識期權, 股塲上倆共同進退揾銀, 本是美事, 但後來朋友就係因為輸期權, 而冇咗半褲身家; 當你以為可以馭駕工具咩, 可能巳經係俾件工具玩緊你了.

十年前, 小弟都上過生命動力嘅 basic 堂, 當年都係承蒙老友 Issac 關照 enrol 我嘅, 心有戚戚焉, 不過時至今日, 卻仍見老友埋首, 沉迷於此等感情遊戲, 小弟心里惆悵, 都不知老友是福還是禍了.

想當年 1998、99 時, 老電嘅 Super Netvigator (IMS), 係全港首個寬頻 ISP, 提供 1.5M ADSL 式嘅上網服務, 朝 10 晚 10 定價任用, 由嗰陣開始, 我就有台 Server 日日長開 (10-10) online 上下載了.

當時嘅 IMS 響技術同覆盖範圍上, 佢都係最領先嘅公司, 不過估唔到佢響呢 10 年光境, 停滯不前, 技術嘅嘢, 不進則退, 呢幾年間, 佢嘅家居寬頻服務明顯比唔上和記 (HGC) 同香港寬頻 (HKBN), 真係又貴又差.

睇嚟 PCCW 同 Netvigator 個 brand name 巳經比呀 Richard 玩殘咗, 8 號仔要上番 5 蚊, 唯有靠財技股本重組 (4 合 1) 了.

有謂各有前因莫羨人, c 奶睇人, 只係睇到人哋嘅表面成就, 十分之嘅皮毛, 根本就冇睇到人哋嘅成功背後嘅付出代價; 成 q 日話人點點點好, 點點點叻, 大佬, 人哋幾生修道, 修番嚟嫁, 你估真係天跌落嚟咩!

又謂知足者常樂也, 不知足者富亦憂; 老友 Fox 講得好, 其實開心可以好 easy, 最主要睇各下是否容易满足. 而我亦自名係一個開心快活人, 是關好多嘢都係是 q 旦旦, 得過而過, 衣食從簡, 不奢不求, 知足安穩; 但係, 咁又唔代表我係 d 不思進取嘅人, 只係君子有所為, 有所不為也.

另外, 響網上睇到一段有關”說話的藝術”嘅格言, 此錄備忘:
少說抱怨的話, 多說寬容的話; 抱怨帶來記恨, 寬容乃是智者.
少說諷刺的話, 多說尊重的話; 諷刺顯得輕視, 尊重增加了解.
少說拒絕的話, 多說關懷的話; 拒絕形成對立, 關懷獲得友誼.
少說命令的話, 多說商量的話; 命令只是接受, 商量才是領導.
少說批評的話, 多說鼓勵的話; 批評產生阻力, 鼓勵發揮力量.