期權長倉

新一輪 IPO 潮又嚟, 都係 d 大陸地產, 內房股等, 聽見都無胃口, 何況早排我嗰 d 潛水 IPO 貨都未解决, 所謂舊債未清, 新債免問, 唯有專心工作, 不問呢輪 IPO 了; 不過, 我並非睇淡, 反而直覺呢期 IPO 係會有 d 水位升, 須非大升特升, 但總不至於潛水嘅.

月頭嗰陣無咁忙, 便同埋退休權友去大福聽講座, 講開得知, 老友月頭 long 咗 20800 put, 付期權金搏恆指跌開繼續跌, 點知佢開倉第二日, 恆指巳經反彈四佰幾點, 跟著一 d 都無俾機會佢平倉, 月頭至宜家, 巳經有成 2000 多點升幅, 老友 500 幾點期權金可能就咁忍著淚說 good bye 了. 呢 2000 點升幅, 我諗跟本同大部份老散無緣, 賺到呢轉錢嘅, 只有極少數人, 而輸熊証嘅人就大把.

話說一早就提老友, 國慶後市, 一定會大單邊, 不過吾能知升定跌, 所以要落 long 注, 最穩陣就係 long 晒兩邊, 齋做一邊就如同買大細, 如果 win, 當然贏開巷, 但係輸起上嚟會輸得好快; 而做即月期權 long, 就等同炒末日輪, 時間會係你嘅一大敵人, 炒賣見機要快, 莫全憧憬, 有賺就要走, 輸錢就更加要走得快.

希望老友有記得我講過, 國慶假後就要至少平部份倉, 減低風險, 一到月中就要平晒所有 long 倉, 全面止賺 or 止蝕, 千其唔好繼續揸 long 等運到, 否則輸時間值, 會輸得好金. 而至於我, 仍然係只會 short, 吾會 long; 其實咁耐以嚟, 我都只係好耐以前 long 過一次咁大把, 而嗰次只不過係(手禁)錯機, 竟然一次過 long 錯咗 21 張大期! 嗰次嘅結果, 就更係輸到呀媽都唔認得啦.

Written by cheapboss on October 22nd, 2009 with no comments.
Read more articles on 期權盤路 and 股海餘生.

股海點滴

早兩年抽 IPO 屢有斬獲, 不過近年巳經輸番凸俾佢, 今年年頭又賴嘢, 抽中咗幾手買煙買酒嘅銀基, 至今經巳跌咗近 4 成,  齋輸一隻銀基, 巳經輸到呀媽都唔認得. 最近, 又跟上潮流, 以大搏小再抽中冶, 結果真係抽中, 中冶變衰嘢, 破發兼深度潛水收塲, 又一次中招賴嘢. 唉, 唔賭唔知時運高, 一試就知自己仲係行緊衰運, 所謂唔係你財, 唔入你袋, 以後死心不再抽新股了.

噚日恆指期結, 月中曾經致電揾退休權友, 一直都揾佢唔到, 擔心不已佢有咩事, 今日終於打通電揾到佢, 佢話就話反咗去大陸玩, 但係問多幾問, 先知佢月頭 short 咗 21000 call!!! 我諗番月中我打電話俾佢嗰陣, 恆指係響 21700 度上落緊, 佢月頭開倉, 賬面咪輸緊成 3 萬幾蚊一張合約! 佢嗰陣一定唔係響大陸玩, 而係輸到無心機聽我電話了. 好在老友死揸挨到月尾, 結果反敗為勝, 不過又係食足成個月驚風散, 賺幾多都補唔返. 唉, 老友咁賭法, 遲早有一鋪要上 IFC 玩笨豬 jump.

就嚟 10.1, 大陸今年國慶+中秋 8 day 大假, 係有屎以嚟最長黃金週假, 由 10 月 1 日放到 10 月 8 日, 10 月 9 日先返工, 對於我嚟講, 呢個係千年難得一見 short 國企指數期權賺錢嘅好機會, 不容錯過, short 晒兩邊 call put, 賺時間值嘅期權金, 包保賺到笑, 實食冇黐牙. 不過黃金週假後, 國指走勢難測, 所以 9 號之前就要收手平倉了. 如果 9 號前唔平倉, 輸咗唔好入我數.

Written by cheapboss on September 30th, 2009 with no comments.
Read more articles on 期權盤路 and 股海餘生.

默默耕耘

自識寫 program 以來, 都想話寫 d 有用嘅 freeware 之類, 公諸於世, 揚名立萬, 舉世聞名, 甚至可以靠 freeware 之 donation 發達; 當然此乃夢想, 至今此夢未圓. 不過, 自舊年秋 9 月始, 開發咗個關於指數期權嘅 website - 香港指數期權網, 此夢想竟有成真實嘅條件了.

初不初, 我寫個咁嘅 website, 其實都係為咗方便自己, 原意係將 HKEx 嘅指數期權 data, 簡化做 Excel, 再將 Excel 轉換成 webpage 上載去 web server 度, 咁就可以用部 Pocket PC 嚟睇 d 指數期權 data. 點解要自己寫 d 咁麻煩嘅嘢? 原因係我揾咗好耐, 應該周街都冇 d 咁嘅料同 website, 而但係一個咁嘅站, 對於好似我呢 d 期權新手, 就非常有用, 所以唯有自己攪個站. 就係咁, 我個 website 就有咗佢嘅獨特性同埋原創性, d 料實用而又唔係周街都有嗰隻.

雖然 d 料唔係 real-time data streaming, 只係每數分鐘 update 一次; 而呢 d 權市嘅 data 亦都唔係我嘅 data, 只係由 HKEx 個 webpage 度讀番嚟, 不過經過處理, 用比較好嘅方式表達出嚟; 同樣嘅 data, 響 HKEx 度難睇到嘔, 而響呢個站度, 就易睇易明得多, 此為此站之價值也.

而 generate 指數期權 webpage 個 program 一半係用 Excel 寫, 一半係用 php, 寫完之後, 用咗都半年, 冇咩 bug, 唔洗點 maintenance; 宜家個個 weekday, 權市交易時間內, 不斷幫我做嘢, 忠於職守, 任勞任怨, 默默耕耘, 感人肺腑…

至今, 香港指數期權網嘅造訪次數巳經多過 15 萬、網頁檢視近 180 萬次、交易日子造訪大約 1800 人次; 由於期權買賣響香港, 唔算得係主流投資工具, 有此人流, 都算係咁了, 雖然仲有大把進步嘅空間. 還有值得高興嘅係, 上個禮拜, 卒之收到此網站嘅第一次廣告回報了 - Google AdSense 一次過轉帳咗呢幾個月嘅廣告費嚟, 雖然唔係多錢, 不過總算係個開始吧.

Written by cheapboss on April 7th, 2009 with no comments.
Read more articles on 期權盤路 and 生活壓力 and 股海餘生 and 資訊科技.

四月後市

琴日 (2日) 臨收市, 4:05pm 至 4:12pm 期間, 四月 HSI 大權曾出現異動, 有幾單直接大手交易成交, 斷估應該係跨價組合. 第一單大手成交 500 套, 響 4:05pm 先出現, 係 4 月份大權 HSI 13000 call 同 16000 call, 造價分別為 1240 點和 250 點, 差價為 990 點. 於 4:10pm、4:11pm 同 4:13pm, 大戶繼續加注同樣嘅策略組合, 成交數量分別為 500 套、500套同 250 套.

點睇呢單大 deal, 為數合共 1750 套嘅 HSI 大權跨價認購期權組合, 應屬同時 long 13000 call 同 short 16000 call, 或者相反, 同時 short 13000 call 同 long 16000 call; 於恆指位於 12861 時, 大戶入市做呢兩個行使價嘅跨價部署, 斷估多數係 long 13000 call 同 short 16000 call.

齋睇呢單期權部署, 即係話大戶認為未來三個月內恆指會響 13000 點水平之上,但係唔會升穿 16000 點, 但如果係相反, 即係大戶認為未來三個月內, 恆指將於13000 點水平之下.

照計, 由於即使恆指唔升穿 13000 點, 大戶每套組合嘅利潤只係得 990 點, 遠低於最高損失空間 (16000 - 13000) - 990 = 2010 點, 加上港股短期已超賣, 估計大戶唔會咁樣做, 因為計值博率一 d 都唔吸引. 又如果大戶做 long 13000 call 同 short 16000 call, 每套組合俾 990 點, 但係最多可以賺成 2010 點; 由此可以斷估呢個先係大戶嘅部署.

再斷估呢一兩個月之內, 港股仲未有運行, 所以大戶部署響 4月嘅期權; 雖然呢單料對短期啟示唔大, 但因為大戶要動用嘅資本勁大 (for short 16000 call 嘅按金), 所以千奇唔好睇小呢單 deal  嘅重要性, 預示咗大戶睇中期後市應為升市.

Written by cheapboss on February 3rd, 2009 with no comments.
Read more articles on 期權盤路.

大權異動

今日 lunch 時, 睇一睇恆指期權盤路, 發覺有 d 唔對路, 即時出 post 去 discuss 討論區度.

「恆指期權盤路 大權異動 @10600 大戶大手 long put
發表於 2008-1-19 12:17 PM @香港討論區

大權 10600 Put 成交量超大, 大戶勁 long put 權, 跌市!」

事發係恆指大權響 10600 價位沽盤成交量異動, 交易時間約 10:05-15, 10 分鐘內成交達 2000 多張, 即係每挌幾分鐘, 就幾佰張幾佰張咁做成交, 只有大戶做倉先係咁, 舉動極其異常. 有見及此, 即刻出 post 示警, 話有大戶忽然勁 long put 大權 10600, 跌市之兆!

此 post 一出, 回響甚大, 而且引出一眾 VIP, 尊貴會員, 高級會員等現身. 當中提到, 點睇大戶究竟係做好倉 short put, 定係做淡倉 long put? 基本上, 大戶係唔會用咁多按金去 short 嚟賺果10 幾點權金, 你估d 大戶傻嘅咩, 所以 long 嘅機會係好高.

又提到, 大戶可能係平倉, 但係睇番 10600 未平倉合約, 得嗰幾百張, 無可能係平倉; 至於會唔會用嚟做其它嘢嘅對沖, 就不得而知了.

下午茶時間, 又偷空睇一睇個市, 雖然係跌緊, 但斷估未到大戶嘅食糊位, 又出一次 post,

「我估有大戶收到 d 內幕料, 搏超短線嘅跌幅, i.e. 今日下午至最多星期三.
不過真係好小響 d 咁嘅位開戰. 我睇大戶資金有限, 但 d 內幕料又好堅, 唯有用招刀仔鋸大樹, 以小搏大.」

此 post 一出, 又再引嚟高手討論, 軒起回響; 臨放工前約 6pm, 巳經有成佰幾個 post 了. 返到屋企, 再出多一次 post,

「都係個句, 齋睇期權盤, 我估應該係有大戶睇淡, 落注 long put, 以小搏大, 搏短期內下跌, 可能係炒奧巴馬上任好消息出貨, 或者滙控又有不利消息等等, 衹係搏呢一兩日內之跌勢.
當然大戶未必一定中, 不過大戶勝在操控同掌握資訊易過多過我哋 d 老散, 對沖工具又多, 又可以睇往我哋嚟食.」

心諗, 睇市啱唔啱, 跟本吾洗拗, 最多過兩日就知邊個啱, 邊個錯了. 今晚老美冇市冇 ADR 睇, 寫到呢度, 黑期跌超過 -200 點, 蘇格蘭皇家銀行 (RBS) 股價響倫敦大幅下跌超過六成, 匯控股價響倫敦, 亦都急挫逾一成! 睇嚟大戶 d 料真係好堅, 第一回合, 淡友大戶先勝.

後註: 今朝 (20日) 開市前, 仲有人話我響度危言聳聽; 不過開市後, 恆指裂口插水 400 幾點, 鴉鵲無聲了.

Written by cheapboss on January 20th, 2009 with no comments.
Read more articles on 期權盤路 and 股海餘生.

送鼠迎牛

年關將至, 芝加哥 VIX 波動指數又稱之為恐慌指數, 琴晚忽然下跌近一成, 至 46 點, 比起舊年 24/10, VIX 歷史高位 89.53 點, 回落咗近一半; 講明係恐慌指數, 佢下跌就代表市場投資者對於嚟緊嘅行情睇法趨於穩定同樂觀, 股價指數等等變動將會趨於和緩.

星期四恆指裂口大插 700 幾點, 跌穿 13000 點後回穩築底, 絕對係 long call 或者 short put 搏反彈嘅好時機, 如果做張大權 short put 12000, 擺到 29 日牛年開市, 收 200 幾點, 一皮嘢利是過肥年; 就算係無膽匪類, 做張大權 short put 11000, 都有 80 幾 90 點, 袋袋平安 4 仟幾 5 仟蚊. 不過, 呢 d 都係馬後大炮.

好似我呢 d 保守一族, 即係連無膽匪類都不如果 d, 下星期一就要睇實大權 short put 12000, 同 short call 14600, 希望仲有 80 點淨. 今個月恆指月結睇 13600 點咁上下, 下星期一美國係假期無市, 港恆指跟亞爺自由行睇升, 星期二奥巴馬上任繼續升, 跟著長假期前交投疏落, 投資者避險睇淡, 下星期就係咁窄幅上上落落, 鼠年收工, 跟著過年, 牛年初四開市就係結算日. 所以話, 下星期一再唔做 short put, 賺番 d 洗用就笨實了.

Written by cheapboss on January 17th, 2009 with no comments.
Read more articles on 期權盤路 and 股海餘生.

戰區收窄

「恆指期權盤路 13000-16000 之間 戰區收窄」
發表於 2008-1-10 08:22 AM @香港討論區

恆指升穿 15700 後勁回千幾點, 事關美銀同李嘉誠減持建行中行, 股市即時降温, 18000 點 gogogo 之聲不再, 睇即月期權盤路, 恆指未平倉合約示 13000-16000 點為今個月嘅戰區. Call 同 Put 建倉都唔係咁績極, 大盤觀望氣份濃厚.

引伸波幅仍然高企, 持續風高浪急之勢. 估計下星期一恆指多數都係平開; 至於弱雞之勢, 會否借奧巴馬上塲, 由外圍領軍, 帶起恆指過年前反彈? 則要拭目以待了.

奧巴馬效應, 係我唯一一個諗到, 將恆指推返上 16000 嘅原因; 不過, 同樣嘅原因, 亦都可以好快咁, 推低恆指到 13000.

如果要做 d 嘢, 我會做套 14400 Long Straddle, 搏恆指是但向一邊大幅突破; 因為做兩邊 long, 不論贏輸, 16日(Fri) 前都會平倉, 免得輸時間值之損耗.

如果保守 d, 我會等到 19日(Mon), 或者出現咗重大突破之後, 先至做 short 倉. 如果 d 錢咬人, 係都要落注, 我會做張 short put 12000, 因為兩邊都係 2000 點, 我硬係覺得上返 16000 易過跌落 12000.

Written by cheapboss on January 10th, 2009 with no comments.
Read more articles on 期權盤路.

戰線未明

「期權盤路 恆指 11000-15000 之間 戰線未明」
發表於 2008-12-31 10:40 PM @香港討論區

睇即月期權盤路, 恆指未平倉合約 11000-15000 點, 每挌 1000 點間, 都有捧塲客, 而 11000 點同埋 15000 點, 所做張數暫時最多, 分別有 2606 張 & 2860 張.

今日 call 盤嘅成交明顯較多, i.e. 15000 call 同 16000 call, 雖然得半日市, 不過都有成 550 張同 474 張, 因此超短線仍睇升.

下星期一打後, 戰線仍未明朗; 而引伸波幅開始上升, 似是山雨欲來之兆. 一月份假期多, 交易日子少, 但波動不減.

仲有 31/12, 14400 嘅 call 同 put 都有幾大嘅成交, 表現好淡角力, 預期短期內, 快則下個禮拜, 將有重大突破, 各 Ching 留神. 11000 啲 put, 多數係大户 short 做資金 parking, 老散 long 嚟搏短期暴升, 對後市指摽吾係太大. 反而留意 15000 put, 睇嚟似大户 long, 所以我估超短線會升穿 15000.

Written by cheapboss on December 31st, 2008 with no comments.
Read more articles on 期權盤路.