生活壓力
You are currently browsing the articles from Cheapboss Private matching the category 生活壓力.
噚日老細發牙痕, 同我哋吹水, 聽佢講話想退休; 而我就諗番起, 先排跟大人返鄉下住咗兩日, 感受了一下鄉間務農嘅生活, 睇下 d 田, 睇下 d 瓜, 睇下 d 雞週山走, 同隻狗玩下, 咁就兩日了. 我諗如果揸住一佰幾十萬, 一家三口摼摼哋, 我都可以退休返鄉下住過世嘅.
其實我都幾鍾意過 d 咁嘅日子, 與世無爭, 安閒寧靜, 當然最好係不愁衣食, 如果有埋部寬頻上網嘅電腦咁就最好. 可惜嗰度不單只冇寬頻, 冇電腦, d 人冇品, 兼且 d 治安差, 仲要格涉到爆, 門口行去村口都要成半粒鐘, 等車搭車出到市又要粒幾鐘, 一出一入來回冇咗半日, 如果要朝早出市辦事, 雞啼就要起身, 不過佢哋都習慣咗晨早 5,6 點起身了.
好很奇怪, 最近經常有呢種恍如隔世嘅感覺, 好似嗰幾日行開咗, 冇理 d 咩財經股市, 不問世事幾日, 返到香港, 好似好陌生, 返到公司, 連枱頭部機個 login password 都唔記得咗, 山中一日, 直情係人間十年; 又好似, 先兩日出到去高登, 又係好似好陌生咁, 多咗好多新鋪, 見到好多新嘢, 奇怪嘅係, 我上次嚟高登只係 4, 5 個月前, 點解變化咁大嘅?
又好似, 近日我重操當年 web-based GIS 嘅故業, 積極咁研究 Google Maps API 點用, 驀然回首, 我當年用 MapInfo MapXtreme 做 engine 自巳起 web map server 己經係 10 年前嘅事, 睇下 e 家個 Google Maps, 個 engine 又快, d 圖資 data 又多又齊, 有全世界嘅, 又有香港嘅, 雖然唔算好準好 update, 不過難得嘅係, Google 免費俾晒 d 嘢你任用唔嬲, 仲俾埋 API 你寫 program 嚟 call 佢用, 最近睇佢嘅 API 巳經係發展到第三代了, 而第一, 第二代嘅 API, 我都 miss 咗, 無點留意過, 自 2005 公開到 e 家, 轉眼 Google Maps 都 4 歲幾了.
唔知係呢個世界轉得快咗, 定係我嘅中年遲鈍病發, e 家 d 嘢, 就好似股市, 天氣, 同埋大人 d 脾氣咁, 變化之快另我有窒息嘅感覺, 往往迅雷不及掩耳, 睇嚟我都係時候準備退休返鄉下了.
Written by cheapboss on September 27th, 2009 with 1 comment.
Read more articles on 生活壓力.
早兩日出遠門回程時, 離飛機起飛仲有五六個鐘, 去到車站, 諗著大把時間, 四處逛一下車站附近嘅市雜先至走, 見到擋賣蔥油餅嘅, 流口水之際, 忽然聽到大人大叫, 嘩, 原來呢班係當日由呢度開去機塲最後一班巴士了, 仲有兩個字就開啦! 就係咁, 哪哪聲買飛上車… 後嚟, 覺得好好彩, 咁都趕到尾班車, 如果趕唔到, 又要折騰了.
不過, 人生唔係成日都咁好彩嘅, 有陣時, 一個無喱頭嘅决定, 就足以改變劇情, 好似, 如果大人跟我一齊停低, 買塊蔥油餅食埋先行, 可能就係咁, 就趕唔到搭車了. 而然, 好多時 d 錯誤嘅決定, 都係響匆忙之間做嘅; 但係有陣時, 就算大把時間俾你 plan, 但世事多變, 你又 count 得幾多 factor 呢? 變數多的是, 機關算盡又如何? 諗起許歌神嘅名曲歌詞, “人生如賭博, 贏輸都冇時定, 贏左得餐笑, 輸光唔駛興”.
今日老細又再一次, 迫我做去定留嘅决定, 今次係 final 了, 結果無出其右, 都係選擇留低, 呢度始終都係安全區, 出面風大雨大, 炮火連天, 小弟仔細老婆嫩, 房奴一族擔子非輕, 實在蕭灑不起, 豁不出呢個安全區呢! 真正係歌神嘅”為兩餐乜都肯制前世”.
過兩日會去 in 番同 e 家同一個 post, 如無意外, 應該無意外了, 白忙咗個幾月, 兜兜轉轉, 又係原地踏步, 坐番同一個位, 對番同一班客, 做番同一樣嘅嘢, 人工就…哈哈哈. 有時塞翁失馬, 焉知非福, 世事難料, 你以為佢開大咩, 佢就偏開細, 你估佢開細咩, 佢就開圍骰, 人生禍福、好壞本來就無從預算. 俾你趕到尾班車又點呢? 結果班飛機咪一樣 delay, 返到深圳, 夜到連火車都收埋工. 人算不如天算.
Written by cheapboss on September 2nd, 2009 with no comments.
Read more articles on 生活壓力.
今日小恆子第一日去返學, 冇媽咪響度, 獨自面對新環境, 冇喊冇要媽咪, 仲好乖咁坐咗幾粒鐘, 真係好强悍! 希望小恆子會有本事, 有興趣讀多 d 書, 條路可以易行 d, 將來做人唔洗咁辛苦.
睇番自巳個 CV, 覺得以前比 e 家勤力得多, 至少肯俾心機考番幾張 M 記嘅 cert, 嗰陣仲係行緊 Win 98, NT4 Server, 到今時今日 Windows 7, Win 2008 Server R2 都嚟緊, d cert 全部都過期幾過世代, 大有 cert 到用時方恨少之感, 寫埋落 CV 度, 實比人問到口啞啞… 呀叔, 你 d cert 仲有冇 out d 呀?
記得先排響公司, propose 新買 d server, 用 Win 2008 Server 嚟起, 點知比個同事窒到冇朋友, 話起咗個 server, 邊個做 support 先? 你做 support 呀? 咁你有冇 cert 呀? 即時 O 嘴冇聲出. 然則, 冇 cert 唔代表我唔識, 就算有張 cert, 靠背 braindump 考番嚟, 咁又代表有能力咩? 張 cert 可以代表嘅嘢, 實在太有限了.
上 M 記網 Certification 度睇睇, 先發現 MCSE 2003 都開始 out 了, 新涵頭叫 MCTIP, 至少要 pass 5 科, 每科考試費 625 蚊, 淨係考試都成 3 仟幾, 唉, 又要錢, 又要時間, 又要心機讀書考試, 真係攞嚟賤, 不過為咗揾食, 同埋為咗啖氣, 無辦法, 唯有的起心肝, 考番過晒 d cert 啦.
Written by cheapboss on August 27th, 2009 with no comments.
Read more articles on 生活壓力 and 資訊科技.
啱啱睇完第一集 ATV 播 RTHK 拍嘅《窮富翁大作戰》, 呢套嘢以電視真人騷方式拍, 揾咗幾條富貴蛋散, 過幾日窮人生活, 瞓街瞓板間房洗碗倒垃圾湊仔, 以探討香港貧富懸殊之困局, 以娛樂角度嚟睇, 甚為可觀, 睇過第一集引子, 都幾期望跟住嗰幾集, 睇下嗰幾條富貴蛋散點悽涼法.
其實呢個 idea 都唔係 d 咩新橋, 幾個月前明珠台都播過一套英國 BBC 兩年前拍嘅《做個冇錢人》, Filthy Rich and Homeless, 港台個節目都係抄佢, 不過 BBC 嗰套仲勁, 響 London 過十日, 生活費一個仙都冇之餘, 頭六日連瞓嘅地方都冇, 仲要第四晚凍到落雪, 嗰幾條友瞓足六日街, 行乞賣花揾食, 都係自己攪掂! 反觀 RTHK 嗰班, 除咗個 Eric 外, 個個有工開, 有地方瞓, 都唔駛衰到瞓街, 相比 BBC 嗰班已經算十分富足了.
話時話, 嗰幾條蛋散都真係玩到無野好玩, 走去玩折墮挨窮, 不過只係放下身段 hea 5 日, 之後又咪做返有錢人, 繼續佢哋嘅風流, 佢哋體驗到嘅, 就只係嗰 d 好膚淺嘅所謂貧窮, 點樣點樣, 冇人冇物, 孤單隻影, 點樣點樣, 前路茫茫, 擔驚受怕, 又點樣點樣, 打份牛工, 辛苦疲累等等…
講窮莫過於非洲大陸, 水資源貧乏, 唔好話沖涼洗衫, 就連想飲啖乾淨清潔嘅水, 都係一件奢侈嘅事, 佢吔 d 婦女同細路, 每日都要翻山越嶺, 走去遙遠嘅水源度打水回家, d 細路一來一回行足大半日, 時間就花咗響打水度, 而唔係去返學讀書, WHO 用嚟量度呢個問題嘅嚴重性, 就係睇每人每日行幾遠去水源, 同埋平均用幾多個鐘去打水! 相對於我哋, 要用水嘅時候, 只須開水喉, 去完廁所拉水沖走, 呢 d 對佢哋嚟講, 簡值係窮奢極侈, 天堂生活, 可以擁有一個會出乾淨水嘅水龍頭, 巳經係上天嘅恩賜了.
從來富與貧, 喜與悲, 新與舊, 都只係相對性嘅, 要有比較先會顯露, 無舊嘅顯不出新嘅, 無悲亦唔會有喜, 同樣地, 要有窮鬼先會有富翁, 如果冇咗比較, 點樣窮法都唔會窮得過響非洲, 響香港點折墮極都有啖水飲卦! 又如果要比較, 就算你可以餐餐魚翅撈飯, 大魚大肉, 但係相對 Bill Gates, 巴菲特, 李嘉誠, 你又算老幾? 比起上嚟, 你都算窮得可憐了.
其實, 問題係咩先算窮呢? 窮點樣定義呢? 要窮到水都得飲先算窮, 定係要將所有人嘅財富平均計, 低過平均嘅就算窮呢? 再者, 就算係窮, 又未必等如唔開心, 調轉嚟講, 就算富貴, 都未必一定開心. 講到尾都係嗰句, 知足者貧亦樂, 不知足者富亦憂是也.
Written by cheapboss on August 23rd, 2009 with no comments.
Read more articles on 生活壓力.
最近揾工超忙, 而有個關於揾工嘅問題, 響腦裡縈迥不去, 先排見到個知見卓越嘅老友 Issac, 趁機問吓佢嘅真知灼見. 個問題係, 如果有兩份工俾我簡, 一份人工低, 但係唔洗點做, 又冇壓力, 日日返工等食晏, 食飽等放工, 準時放工返屋企睇 6 點新聞兼煲劇, 相反另一份就人工好, 但係就做到 PK 之餘, 壓力又大, 日日救火, 收咗工返屋企仲要掛住公司嘢, 試呢樣試嗰樣; 如果兩份工都有 offer, 點簡好?
老友冇俾意見我, 不過就同我用知見開悟卡玩塔羅, 是旦抽張, 睇吓張卡有咩 hints 俾到我, 就咁睇好似又係 d 呃人嘅迷信嘢, 其實又未至於此, 每張卡只得個模稜兩可嘅單字 (in English), 仲衰過扶乩, 任你點演譯 up 乜都得, 咩都無講實, 目的就係叫你自巳諗, 至於諗得啱唔啱, 亦都冇人會知, 對與錯只有事過境移才有定論. 咁即係話, 問嚟都多餘, 自已諗掂佢啦! 哈哈.
當然, 邊個唔想有份唔洗做, 人工好又有身份地位嘅 job, 除咗老豆凈落大把, 做二世祖之外, 睇怕都冇矣. 在我而然, 其實要二簡一唔難, 始終係辛苦命錢大 d, 一定係簡份人工好嘅, 就算挨世界都係咁話, 呢個選擇, 可能係反映咗細個嘅時候屋企窮, 正當個個細路週街玩緊嘅時候, 我哋就屈響屋企開工揾食, 自小巳經為咗錢挨慣做慣了. 究景係咪因為咁, 所以就有日後 d 咁嘅慣性選擇呢?
畢竟, 呢個未係一個真正嘅問題, 只係一個假切性嘅問題. 實情係 e 家香港失業大軍廿幾萬人壓境, 差唔多 6% 失業率, 短期內有升冇跌; 人浮於事之際, 邊有可能同時揾到兩個咁高興嘅 offer? 有得 in 都好開心了, 所以只係無風吹吓水, 發吓春秋大夢啫.
Written by cheapboss on August 19th, 2009 with no comments.
Read more articles on 生活壓力.
上個禮拜嘅一晚, 去咗撐老友 Issac 塲, 聽佢同佢 d follower 講吓佢哋上完 d 咩知見心理學 (POV) 課程後嘅分享. 小弟從來都唔會抗拒智識, 本著唔洗咩錢, 知多樣嘢冇壞嘅心態, 去支持吓老友, 何樂而不為.
當然, 呢 d 所謂分享聚會, 都係賣藥式嘅傳銷手法, 對老友嚟講, 可能只係佢導師培訓嘅一個習作, 然則, 小弟對呢 d 勵志課程冇咩偏見同反感, 佢只係教導一 d 方法, 疑似係 d 心理分折工具, 話可以助人思考, 至於向善定行惡, 則悉隨尊便.
從呢班人中, 都領略出一 d 嘢, 佢哋第一次見面, 都係同你講, 你好面善, 好似響邊度見過你咁, 唔係一個半個係咁, 而係個個都係咁講… 哈哈, 一睇就知係同一個 course 同一個 tutor 教出嚟嫁啦, 第一次見面就扮相識扮熟絡, 唔係咁老土呀?
先排睇咗套杜琪峰嘅戲叫神探, 講話每個人心里都有鬼, 而所謂嘅鬼, 就係由細到大久而久之累績嘅經驗, 行為, 思考模式, 習慣等個性, 又因為你做咗咁多年人, 早就依賴咗呢 d 個性, 對事對人每有特定嘅做法同睇法, 而呢 d rule 對絕大部分人嚟講, 都行之有效, 點解要改變呢? 改變咗唔一定會好咗, 衰起上嚟, 轉變可以衰上加衰, 好似 d 股價響股災咁, 低處低未算低, 跌極都仲有得跌.
知見治療話可以幫人深層了解, 突破自已心里嘅鬼, 不過我響會上都提出咗, 跳出既有嘅安全框, 作出改變係會有重大風險的, 情形猶如響 firewall 里面, 將一 d 以前 set 落嘅 rule 刪除, 而呢 d rule 可能已經過時, 可能已經無用, 但係最大嘅可能係, 個 firewall 已經俾你廢咗, 中門大開, 你話危唔危?
而認識一種工具亦不等如要運用該等工具, 就好似兩年前, 有朋友教我認識期權, 股塲上倆共同進退揾銀, 本是美事, 但後來朋友就係因為輸期權, 而冇咗半褲身家; 當你以為可以馭駕工具咩, 可能巳經係俾件工具玩緊你了.
十年前, 小弟都上過生命動力嘅 basic 堂, 當年都係承蒙老友 Issac 關照 enrol 我嘅, 心有戚戚焉, 不過時至今日, 卻仍見老友埋首, 沉迷於此等感情遊戲, 小弟心里惆悵, 都不知老友是福還是禍了.
Written by cheapboss on August 16th, 2009 with no comments.
Read more articles on 生活壓力 and 股海餘生.
大人周不時張家長李家短, 左右隔離八掛一番, 盡顯 c 奶本色. 其實我都係條八公, 幾鍾意聽人是非, 不過都係左耳入右耳出, 聽完就算, 正所謂閒談莫說人非, 唔似得大人咁上心上頭, 做其極級 router 唔在講, 仲要揾呀張三個仔同小恆子比, 揾呀李四同小宛子比. 唉, 老生常談人比人比死人.
有謂各有前因莫羨人, c 奶睇人, 只係睇到人哋嘅表面成就, 十分之嘅皮毛, 根本就冇睇到人哋嘅成功背後嘅付出代價; 成 q 日話人點點點好, 點點點叻, 大佬, 人哋幾生修道, 修番嚟嫁, 你估真係天跌落嚟咩!
又謂知足者常樂也, 不知足者富亦憂; 老友 Fox 講得好, 其實開心可以好 easy, 最主要睇各下是否容易满足. 而我亦自名係一個開心快活人, 是關好多嘢都係是 q 旦旦, 得過而過, 衣食從簡, 不奢不求, 知足安穩; 但係, 咁又唔代表我係 d 不思進取嘅人, 只係君子有所為, 有所不為也.
另外, 響網上睇到一段有關”說話的藝術”嘅格言, 此錄備忘:
少說抱怨的話, 多說寬容的話; 抱怨帶來記恨, 寬容乃是智者.
少說諷刺的話, 多說尊重的話; 諷刺顯得輕視, 尊重增加了解.
少說拒絕的話, 多說關懷的話; 拒絕形成對立, 關懷獲得友誼.
少說命令的話, 多說商量的話; 命令只是接受, 商量才是領導.
少說批評的話, 多說鼓勵的話; 批評產生阻力, 鼓勵發揮力量.
Written by cheapboss on August 2nd, 2009 with no comments.
Read more articles on 生活壓力.
花咗幾晚時間, 整理翻好個 CV, 填埋份 GF340 政苦職位申請表, copy d cert 呀, reference letter 等, 攪咗一大餐, 希望唔好俾人投籃.
都唔明份 GF340 點解會係 pdf format, 係都要我揾個 Acrobat 先開到嚟填嘢, 真係麻 q 麻煩. 好在整咗一次之後, 第日可以無限次 reuse 翻.
都唔明點解政苦咁 q 多部門, 都無得網上遞交職位申請; 簡單到好似創新科技署咁, 是是旦旦整個 job@itc.gov.hk, 用 email 嚟收申請咪得囉, 點解咁 simple 嗰 d 部門都唔做?
都唔明點解漁農署, 請個 cheap cheap 調理農務主任 (Nature Conservation Officer), 除咗要有關嘅 degree 之外, 仲要會考中英文成績都要有 C 或以上! 個主任請嚟對住棵樹啫, 個門檻洗唔洗 set 到咁 q 高呀? 不過, 咁就証明外面嘅競爭, 係幾咁之大.
響呢個騎呢世界, 實在有太多唔明嘅嘢, 睇嚟如果有得 in 嘅話, 點都要早 d 揾吓料, 做定功課先得了.
Written by cheapboss on July 24th, 2009 with no comments.
Read more articles on 生活壓力.
老友來電慰問, 關於小弟收大信封嘅原因, 實則而家 d 通知, 已經係用 email, 正確嚟講, 叫大 email 仲啱 d.
被叮走嘅原因好簡單, 我公司係合約服務承包商, 公司唔中 bid, 我哋咪要執包服走人囉. 當然, 我可以走去中 bid 嗰 d 公司度敲門, 叫佢請翻我, 爭取番同樣嘅 paid, 同樣嘅 post, 不過, 呢個世界, 冇話冇咗邊個就唔掂, 妨且響個 pool 度, 人才多的是, 所以千其唔好自視太高, 以為人哋一定要指意自己.
下列 T22 中 bid 嘅承包商, 以備參考:-
1. Automated Systems Limited, 減 OT, 兼做死你嘅不該公司
2. Camcentre Limited, 有人情味, 唔錯嘅公司
3. CL Technical Services Limited, 細公司
4. EDPS Systems Limited, 高 rate, 幾好 offer 嘅公司
5. Global Executive Consultants Limited, 新仔, 冇 info
6. InfoTech Services Limited, 食水深, 公司口碑麻麻
7. IT Solutions Limited, 新仔, 冇 info
8. Manpower Services Limited, 減人工 6%, 請你都吾好去嘅無良公司
9. PCCW Solutions Limited, 口碑麻麻
10. Synova Inc., 細公司, d staff 態度差
11. Tangspac Consulting Pte Limited, 新仔, 冇 info
Written by cheapboss on July 23rd, 2009 with 1 comment.
Read more articles on 生活壓力 and 資訊科技.
一個人行緊衰運, 真係痾完尿拉褲鏈都會挾到 JJ. 其實呢排都知自己運滯, 加埋樓上裝修, 攪咗成個幾月都未攪完, 出入沙塵滚滚, 日日嘈喧巴閉, 影響晒啲風水, 所以誅事不宜; 我家陣就算過馬路都睇到清清楚楚, 做咩都小心翼翼, 不過好多嘢, 要避都避唔到, 噩運纏身, 就連身邊 d 好友都壞消息不絕.
老友 Rob, 個仔剛滿兩歲, 例行體檢測試一吓語言能力, 發覺孩子比同齡細路差咗一截, 擔心不巳; 我唯有稍為安慰說, 愛因斯坦到兩歲半, 一樣都未識講嘢, 佢o靚仔個陣, 成日都俾人當傻仔咁辦. 我絕對唔係笑老友個仔, 反而, 齋睇佢個仔 d 相, 我諗 Rob 仔將來會係個天才.
另一邊廂, 恆指月初反覆下跌, 退休老友上兩個禮拜尾, 來電力陳恆指即將插水, 佢更加訓身做淡, 期權倉做咗吾知幾多張 short 19000 call 嘅大權, 賭恆指月結時唔過 19000 點… 我希望佢老人家心臟會挨得過今日, 恆指巳升穿 19500 點, 同埋最緊要係有 cash 補 margin, 免去俾人斬倉, 冇得翻身.
至於我嘅老細, 我俾人叮走, 佢都唔好過, 佢仲接到佢老細嘅 order, 話點都要撈我翻嚟咁話, 不過外於大機構嘅僵化制度, 要撈翻 d 叮走咗嘅 staff, 機會率甚低, 近乎 mission impossible. 響 d 咁騎呢嘅制度下, 對 d staff, 對老細, 對 client, 無一個有利, 無一個開心, 講到尾, 都係嗰句,「曾不該」.
Written by cheapboss on July 20th, 2009 with no comments.
Read more articles on 生活壓力 and 股海餘生.
« Older articles
No newer articles