Face 週刊
FACE 週刊 第 115 期 - 反面真相 唐貝詩衰二五 何超盈:「佢成日call記者!」

真面目

寇鴻萍長女唐貝詩(Lydia)同何鴻燊四房女何超盈(Sabrina),以前經常孖住夜蒲,但最近唐貝詩突然自爆2人感情轉淡,而超盈更話:「我哋唔係好熟!」
反目有因,據知超盈一早已對好友經常借自己宣傳深感不滿,最近超盈被記者影到與新男友Greg拍拖,有人認為是唐貝詩放料靠害,繼而嬲爆斷交。超盈更向本刊直認:「佢(唐貝詩)成日call記者,唔只一次喇。佢細個同我係朋友,唔代表家係囉!」


同樣英國讀大學、19歲何超盈與20歲唐貝詩傳出姊妹反目,事緣上週五(7月31日)晚唐貝詩出席Fevar兩周年派對,被記者問及超盈新男友Greg時,突然態度冷淡話:「唔知,唔想講,可能人哋唔鍾意,以前問咩都答,家唔想答。」

放料跣姊妹
唐貝詩唔多提,有指2人冇friend做因早前超盈被傳媒影到與新男友Greg拍拖,連男友任職室內設計師都被起埋底,超盈懷疑一向跟傳媒友好的唐貝詩是二五女,繼而斬纜斷交。反目早有伏線,超盈和唐貝詩每次夜蒲,行蹤例牌通天,加上唐貝詩經常借facebook兼發相畀傳媒自我宣傳,次次中伏超盈當然心裏有數,遂決心疏遠唐貝詩。

禁講賭王病
本週一(3日)本刊致電超盈求證,她直說:「佢(唐貝詩)成日call記者,唔只一次喇!佢細個同我係朋友,唔代表家係,朋友係要換o架!可能突然間大家性格不合,做唔到朋友囉!我就嚟返暑期工,唔想有咁多argue,影響到我嘅形象囉!」至於問到賭王父親入住港安醫院養病,「媽咪話唔可以講屋企嘢,自己嘢可以答嘅!」大個女家事唔外揚,賭王夠放心啦!

何家女搵細藝
暑假到,何家留學千金返晒香港,瘦咗又靚咗嘅四房超盈就同埋新男友決定戒煙戒夜蒲唔玩,為愛修心養性,加埋三房超雲、超蓮又開鋪賣手袋,個個仔女都咁生性,賭王父親大可以放心留院養病。


以前超盈(左)同唐貝詩(右)經常貼住面影閨房照,情如姊妹。可惜最近超盈懷疑被同傳媒友好嘅唐貝詩出賣,繼而斬纜冇friend做。對此唐貝詩只說:「我開緊會,遲啲覆你哋。」但至截稿前她及母親寇鴻萍均未有回覆。


罪狀一︰天文台
上年8月,唐貝詩喺中環蒲場Fevar搞比堅尼派對,同場還有超盈孖住「翻版李準基」Edwin一齊玩,明明係私人派對謝絕記者,但又被記者影到相,難怪超盈起疑心。


罪狀二︰宣傳易
上年唐貝詩喺自家club場Fevar搞20歲生日派對,超盈亦有到賀,但又忽然安排記者入場影相,免費宣傳呀!忽然1周 第 115 期 圖片


罪狀三︰博見報
上年平安夜,唐貝詩同超盈到集美會派對玩完後,孖住離場時又有記者影相,難怪超盈都忍唔住對本刊話:「唔只一次囉!」《蘋果日報》圖片


自己谷
上週五寇鴻萍有份投資嘅Fevar 2周年派對,冇咗何家千金做生招牌,唐貝詩聯同阿媽、細妹唐貝欣(左),性感谷宣傳。


三房開鋪
19歲超雲和18歲超蓮屋企名牌多,今年就學人搞環保,齊齊創業出售自己嘅二手名牌衫袋,超雲仲話已經搵到鋪同成功叫業主減租添,好有諗頭喎!壹週刊 第 115 期 圖片


四房做banker
超盈上年就喺法庭做暑期工,今年就去銀行做banker assistant,個個範疇都做勻,咁生性老豆肯定好開心啦!




face 1.0